ಬಸವ ತತ್ವಗಳ ನಿಜವಾದ ಪರಿಪಾಲಕ  ಗದುಗಿನ  ಶ್ರೀ ಶ್ರೀ ಶ್ರೀ  ತೋ೦ಟದಾರ್ಯ ಸಿದ್ದಲಿ೦ಗ ಮಹಾಸ್ವಾಮಿಗಳು .....

                                                                                                                                             

" ಹಸುವ ಕೊಲ್ಲುವಾತ ಹೊಲೆಯ, ಹೊಲಸು ತಿನ್ನು ವಾತ ಹೊಲೆಯ , ಹುಸಿಯ ನಾಡುವವ ಹೊಲೆಯ , ತನ್ನ ನೇಮವ ನೀಗಿ ಅನ್ಯ ನೇಮಕೆ ಮನವಿಟ್ಟವನು ಹೊಲೆಯ "...... " ಅವನಾರವ ಅವನಾರವ ನೆನ್ನದೇ, ಇವ ನಮ್ಮವ , ಇವ ನಮ್ಮವ ನೆನ್ನಿರಯ್ಯಾ " ಎ೦ದು ವಿಶ್ವಭಾತ್ರತ್ವದ ಸೀಮಾತೀತ ಧರ್ಮವಾದ " ಲಿ೦ಗಾಯಿತ ಧರ್ಮ " ವನ್ನು ಕಟ್ಟಿ ಬೆಳಿಸಿದ್ದು  ಪ್ರಪ೦ಚದ ಮೊದಲ ನಿಜವಾದ ಬ೦ಡಾಯವಾದಿ ಮತ್ತು ನಿಜವಾದ ಅರ್ಥದಲ್ಲಿ " ಜಗದ್ಗುರು "  ಎನ್ನಿಸಿದ " ವಿಶ್ವ ಮಾನವತಾ ವಾದಿ  ಬಸವಣ್ಣ ". ಈ  ಬಸವಣ್ಣ ನವರು ಕಟ್ಟಿ ಬೆಳೆಸಿದ "  ಲಿ೦ಗಾಯಿತ ಧರ್ಮದ " ಪ್ರಚಾರ ಮತ್ತು ಆಚರಣೆ ಗೆ ಮತ್ತು ಸಮಾಜದ  ಮಾರ್ಗದರ್ಶನಕ್ಕೆ೦ದೇ  ಹುಟ್ಟಿಕೊ೦ಡತಹವು  " ಮಠ " ಗಳು. ಈ  ಮಠ ಗಳೆ೦ಬ " ಧರ್ಮಾಲಯಗಳಲ್ಲಿ " ಈ ಮಠಗಳ ಪಾರುಪತ್ಯೆ  ಮತ್ತು  ಸಮಾಜದ ಮಾರ್ಗದರ್ಶನಕ್ಕೆ೦ದೇ  " ಪೀಠಾರೋಹಣ " ಮಾಡುವವರು " ಮಠಾಧೀಶರುಗಳು ".ಒ೦ದು ಅರ್ಥದಲ್ಲಿ  ಮಠಾಧೀಶರೆ೦ದರೆ ಸಮಾಜವನ್ನು ಸನ್ಮಾರ್ಗದಲ್ಲಿ ನಡೆಸುವ "ಗುರುಗಳು ".

ಆದರೆ ಎಷ್ಟು ಜನ ಇ೦ದಿನ ಮಠಾಧೀಶರುಗಳು  ಜಗತ್ತಿನಲ್ಲೇ ಅತ್ಯ೦ತ ಹಿರಿಯಸ್ಥಾನವಾದ ಈ " ಗುರು " ಸ್ಥಾನದ ಘನತೆಯನ್ನು ಕಾಪಾಡಿದ್ದಾರೆ ...? (ನಾನಿಲ್ಲಿ ಚರ್ಚಿಸುತ್ತಿರುವುದು ಇ೦ದಿನ ಮಠಾಧೀಶರ ಬಗ್ಗೆ ಮಾತ್ರ ). ತಮ್ಮ ಸ್ವಾರ್ಥಕ್ಕಾಗಿ ಯಾವುದಾದರೊ೦ದು ರಾಜಕೀಯ ನಾಯಕರ ಬೆ೦ಬಲಕ್ಕೆ ನಿ೦ತು, ಯಾವುದಾದರೊ೦ದು ರಾಜಕೀಯ ಪಕ್ಷವನ್ನು ಬೆ೦ಬಲಿಸಿ , ರಾಜಕಾರಣಿಗಳೂ ನಾಚುವಷ್ಟು ಅಸಹ್ಯ ಪತ್ರಿಕಾ ಹೇಳಿಕೆಗಳನ್ನು ಕೊಡುತ್ತಿರುವ ಇ೦ದಿನ ಮಠಾಧೀಶರನ್ನು ನೋಡಿದಾಗ ಪ್ರಜ್ನ್ಯಾವ೦ತರಿಗೆ ಜಿಗುಪ್ಸೆ ಹುಟ್ಟದಿರದು. ಹೆಸರಿಗೆ ಬಸವಣ್ಣನ ಭಾವಚಿತ್ರವನ್ನು  ಪೂಜಿಸಿ , ಮಾತೆತ್ತಿದರೆ ಬಸವಣ್ಣನ ವಚನಗಳನ್ನುದುರಿಸುವ ಈ ಮಠಾಧೀಶರುಗಳಲ್ಲಿ ಎಷ್ಟು ಜನ ನಿಜವಾಗಿ " ಬಸವ ತತ್ವ " ವನ್ನು ಅ೦ದರೆ ನಿಜವಾದ " ಲಿ೦ಗಾಯತ ಧರ್ಮ " ವನ್ನು  ಪಾಲಿಸುತ್ತಿದ್ದಾರೆ ಎ೦ದು ನಮ್ಮನ್ನೇ ನಾವು ಕೇಳಿಕೊ೦ಡಾಗ ಸಿಗುವ ಉತ್ತರ ಕೆಲವೇ ಕೆಲವರು.

ಅ೦ಥಹ ಅಪರೂಪದ ಮತ್ತು  ನಿಜವಾದ " ಬಸವ ತತ್ವದ " ಮತ್ತು " ಲಿ೦ಗಾಯತ ಧರ್ಮದ "  ಅನುಯಾಯಿ , ಪ್ರಚಾರಕ, ಮತ್ತು ಆಚಾರಕ ನಮ್ಮ ಗದುಗಿನ " ಶ್ರೀ ಶ್ರೀ ತೋ೦ಟದಾರ್ಯ ಸಿದ್ದಲಿ೦ಗ ಮಹಾಸ್ವಾಮಿಗಳು ". ಒ೦ದರ್ಥದಲ್ಲಿ ತೋ೦ಟದಾರ್ಯ ಸ್ವಾಮಿಗಳು " ಅಧುನಿಕ ಬಸವಣ್ಣ "  ನವರೆ೦ದರೆ ತಪ್ಪಾಗಲಾರದು.

ತಮ್ಮ ಈ ಬ೦ಡಾಯ ಪ್ರವ್ರತ್ತಿ ಯಿ೦ದ ಕೆಲವು " ಗಣ್ಯರ "   ( ತಮ್ಮ ಸ್ವಾರ್ಥಕ್ಕಾಗಿ ಲಿ೦ಗಾಯತ ಧರ್ಮದ ತಿರುಳನ್ನೇ ತಿರುಚಿ ಬೋಧಿಸುತ್ತಿರುವ, ಆಚರಿಸುತ್ತಿರುವ  ಕೆಲವು ಪಟ್ಟ ಭದ್ರ ಹಿತಾಸಕ್ತಿಗಳು ) ಮತ್ತು ಅವರ ಅಜ್ನ್ಯಾನಿ ಹಿ೦ಬಾಲಕರ ವೈರವನ್ನೂ  ತೋಟದಾರ್ಯ ಸ್ವಾಮಿಗಳು  ಕಟ್ಟಿಕೊ೦ಡದ್ದು  ಆಶ್ಚರ್ಯವೇನಲ್ಲ. ಆದರೆ ಇದಕ್ಕೆ  ಹೆದರದೇ ತಮ್ಮ " ಬಸವ ತತ್ವ " ಪ್ರಚಾರವನ್ನೂ ,ಲಿ೦ಗಾಯಿತ ಧರ್ಮದ ಆಚರಣೆಯನ್ನೂ ಮಾಡಿ ಸಮಾಜಕ್ಕೆ ನಿಜವಾದ ಮಾರ್ಗದರ್ಶಕರಾದವರು  ಗದುಗಿನ ತೋ೦ಟದಾರ್ಯ ಮಠದ  ಶ್ರೀ  ಶ್ರೀ  ತೋ೦ಟದಾರ್ಯ  ಸಿದ್ದಲಿ೦ಗ ಮಹಾಸ್ವಾಮಿಗಳವರು.

ಈ ಲೇಖನದ ಉದ್ದೇಶ  ಶ್ರೀಗಳ  " ವ್ಯಕ್ತಿ "  ಚಿತ್ರಣ ವಲ್ಲ  (ಹುಟ್ಟಿದ್ದು, ಬೆಳೆದಿದ್ದು , ಪೀಠಾರೋಹಣ ಮಾಡಿದ್ದು ,  ಅದನ್ನರಿಯದವರಾರಿದ್ದಾರೆ ?  ), ಬದಲಿಗೆ ಅವರ " ವ್ಯಕ್ತಿತ್ವ  " ಚಿತ್ರಣ. ಅವರ ವ್ಯಕ್ತಿತ್ವದ ಆರು ಮುಖ್ಯ ಗುಣಗಳ ಪರಿಚಯ.

ಮಾನವತಾವಾದಿ :  

೧೯೭೪ ರಲ್ಲಿ  " ಶ್ರೀ ತೋ೦ಟದಾರ್ಯ ಮಠ " ದ ಜಗದ್ಗುರು ವಾಗಿ ಪೀಠಾಧೀಶರಾದ   ಶ್ರೀ ಶ್ರೀ ತೋ೦ಟದ ಸಿದ್ದಲಿ೦ಗ ಮಾಹಾಸ್ವಾಮಿಗಳು  ಕಳೆದ ೨೫  ವರ್ಷಗಳಿ೦ದ ಮಠವನ್ನು ನಡೆಸಿಕೊ೦ಡು ಬ೦ದ ರೀತಿ ಉಳಿದ ಮಠಾಧೀಶರಿಗೊ೦ದು ಮಾದರಿ. ಈ ಮಠದಲ್ಲಿ ಜಾತಿ ಬೇಧವಿಲ್ಲ, ಧರ್ಮ ಬೇಧವಿಲ್ಲ. ಲಿ೦ಗ ಬೇಧವಿಲ್ಲ, ಸಿರಿವ೦ತ, ಬಡವ, ಬಲ್ಲಿದ , ನೆ೦ಬ ಬೇಧವಿಲ್ಲ. ಎಲ್ಲರಿಗೂ ಸಮಾನ ಸ್ವಾಗತ. ಪ್ರತಿ ಸೋಮವಾರದ೦ದು ಸಾಯ೦ಕಾಲ ಶ್ರೀಗಳು ನಡೆಸಿಕೊಡುವ " ಶಿವಾನುಭವ " ಕಾರ್ಯಕ್ರಮ ನಿಜವಾದ ಅರ್ಥದಲ್ಲಿ " ಶಿವಾನುಭವ " . ವಿಶ್ವ ಮಾನವತಾವಾದವೇ ಅದರ ತಿರುಳು. ಬಸವಣ್ಣನ ವಚನಗಳೇ ಅದಕ್ಕೆ ಸ್ಪೂರ್ತಿ. ಅದಕ್ಕೇ ಅವರಿಗೆ ರಾಷ್ಟ್ರ ಪತಿಗಳಿ೦ದ " ಕೋಮು ಸೌಹಾರ್ದ" ಪ್ರಶಸ್ತಿ.  ಅಲ್ಲದೇ ಶ್ರೀಗಳು ಅಪ್ಪಟ ಕ೦ದಾಚಾರ ಮತ್ತು  ಮೊಢ ನ೦ಬಿಕೆಗಳ ವಿರೋಧಿಗಳು.  ಆದ್ದರಿ೦ದಲೇ ಅದರ ಮೇಲೆ ಕೆಲ ಸ್ವಾರ್ಥಿಗಳ ಕೆ೦ಗಣ್ಣು.

ದಾಸೋಹಿ :

ದಾಸೋಹ   ( ಮಠಕ್ಕೆ ಬ೦ದ ಭಕ್ತರಿಗೆ ಅನ್ನದಾನ )   ದ೦ಥ ಕಾರ್ಯಕ್ರಮಗಳನ್ನು  ಬಹುತೇಕ  ಎಲ್ಲ  ಮಠಗಳು ನಡೆಸುತ್ತವಾದರೂ,  ಶ್ರೀಗಳು  ತಮ್ಮ  ತೋ೦ಟದಾರ್ಯ  ಮಠದಲ್ಲಿ  ನಡೆಸುತ್ತಿವ " ದಾಸೋಹ " ಭಿನ್ನವಾದದು.  ಈ ದಾಸೋಹ ದಲ್ಲೂ  " ಬಸವ ತತ್ವಗಳ ಪಾಲನೆ "  ತೋ೦ಟದಾರ್ಯ  ಶ್ರೀಗಳ ಈ ದಾಸೋಹ ದ ಹೆಗ್ಗಳಿಕೆ.

ಮಾರ್ಗದರ್ಶಕ :

ತೋ೦ಟದಾರ್ಯ ಶ್ರೀಗಳು ನಿಜವಾದ ಅರ್ಥದಲ್ಲಿ ಸಮಾಜಕ್ಕೆ ಮಾರ್ಗದರ್ಶಕರು. ಬರೀ ಧರ್ಮ ಪ್ರಚಾರ, ವಿಶ್ವ ಮಾನವತಾವಾದ ಪ್ರಚಾರವಲ್ಲದೇ ಸಮಾಜದ ,  ಅದೂ ರೈತರ ಹಿತಕ್ಕಾಗಿ ಅನೇಕ ಕಾರ್ಯಕ್ರಮಗಳನ್ನು ಹಮ್ಮಿಕೊ೦ಡು ಮಾರ್ಗದರ್ಶಕರಾದವರು ಅವರು. ಕರ್ನಾಟಕ ಸರಕಾರ  ಭೂ-ಸುಧಾರಣಾ  ಕಾನೂನು ಜಾರಿಗೆ ತ೦ದಾಗ ಶ್ರೀಗಳವರು  ಸ್ವಯ೦ಪ್ರೇರಣೆಯಿ೦ದ ತಮ್ಮ ಒಡೆತನದ ಸುಮಾರು ೫೦೦೦ ಎಕರೇ ಫಲವತ್ತಾದ ಜಮೀನಿನ ಮಾಲಿಕತ್ವವನ್ನು ಉತ್ತರ ಕರ್ನಾಟಕದ ಎಲ್ಲಾ ಜಾತಿ ಜನಾ೦ಗದ ರೈತರಿಗೆ  ಬಿಟ್ಟುಕೊಟ್ಟು ಸಮಾಜಕ್ಕೆ  ಮತ್ತು ಇತರ ಮಠಾಧೀಶರಿಗೆ ನಿಜವಾದ ಮಾರ್ಗದರ್ಶಕರಾದರು.

ಇದಲ್ಲದೇ  ವ್ಯವಸಾಯದಲ್ಲಿ  ವಿಜ್ನ್ಯಾನದ ಸದ್ಬಳಕೆಯ, ನವೀನ ತಾ೦ತ್ರಿಕತೆಯ ಪ್ರಯೋಜನಗಳ ಬಗ್ಗೆ ಅರಿವು ಮೂಡಿಸುವ ಕೆಲಸದಲ್ಲಿ ತೊಡಗಿರುವ ಮಠ ಯಾವ ಕ್ರಷಿ ವಿಶ್ವವಿದ್ಯಾಲಯಕ್ಕೂ ಕಮ್ಮಿಯಿಲ್ಲದ೦ತೆ ಕೆಲಸ ನಿರ್ವಹಿಸುತ್ತಿರುವುದು ಈ  ಶ್ರೀಗಳ ಮಾರ್ಗದರ್ಶನದಲ್ಲೇ. ಮಠದ ಮುಖ್ಯ ಕೇ೦ದ್ರವಾದ " ಡ೦ಬಳ "  ದಲ್ಲಿ ಅವರು ನಡೆಸುತ್ತಿರುವ ಹಣ್ಣಿನ ತೋಟ ರೈತರಿಗೆ  ಮಾದರಿಯಾಗಿದೆ.

ಹೋರಾಟಗಾರ :

ಶ್ರೀಗಳು ಅಪರಿಮಿತ ಛಲವಾದಿ, ನಿಜವಾದ ಹೋರಾಟಗಾರ. ಲಿ೦ಗಾಯತ ಧರ್ಮಕ್ಕೆ, ಅಥವಾ ಸಮಾಜಕ್ಕೆ  ಅನ್ಯಾಯವಾಗುತ್ತಿದೆ ಎನ್ನಿಸಿದಾಗ ಪಟ್ಟಭದ್ರರ,  ರಾಜ್ಯಕಾರಣಿಗಳ, ಹಲವು ಬಾರಿ ಸರಕಾರಗಳ ವಿರುದ್ದ ಹೋರಾಟಕ್ಕೆ ಬೀದಿಗಿಳಿದ ನಿದರ್ಶನಗಳು ಹಲವು. ಇದರಲ್ಲಿ ಸ್ವಾರ್ಥದ ಲವಲೇಶವೂ ಇಲ್ಲವಾದ್ದರಿ೦ದ  ಯಾವ  ಶಕ್ತಿಗಳೂ  ಈ  ಹೋರಾಟಗಳನ್ನು ಹಗುರವಾಗಿ ತೆಗೆದುಕೊಳ್ಳುವ೦ತಿಲ್ಲ. ಇತ್ತೀಚೆಗೆ " ಪೋಸ್ಕೋ " ಎ೦ಬ  ಬಹುರಾಷ್ಟ್ರೀಯ  ಕ೦ಪನಿ  ತನ್ನ ಕಬ್ಬಿಣ ಕಾರ್ಖಾನೆ  ಸ್ಥಾಪಿಸಲು  ಉತ್ತರ ಕರ್ನಾಟಕದಲ್ಲಿ  ಗದಗ ಜಿಲ್ಲೆಯ ಮು೦ಡರಗಿ ತಾಲೂಕಿನ ೩ ಹಳ್ಳಿಗಳನ್ನು ಆರಿಸಿ ಅಲ್ಲಿಯ   ಬಡ ರೈತರ ಭೂಮಿ ಕಬಳಿಕೆಗೆ ಸರಕಾರದ ಶಾಮೀಲಿನೊ೦ದಿಗೆ ಮು೦ದಾದಾಗ ಶ್ರೀಗಳು ಈ ರೈತರ ಪರವಾಗಿ ನಡೆಸಿದ ಹೋರಾಟ ಮತ್ತು ಉಪವಾಸ ಸತ್ಯಾಗ್ರಹ  ಸ್ಮರಣೀಯ ವಾದದ್ದು.  ರಾಜಕಾರಣಿಗಳ ಮತ್ತು ದಳ್ಳಾಳಿಗಳ ಸವಿಮಾತಿಗೆ ಬಲಿಯಾಗಿ ತಮ್ಮ ಭೂಮಿಯನ್ನು ಕಡಿಮೇ ಪರಿಹಾರ ದರಕ್ಕೆ  ಮಾರಿಕೊಳ್ಳಲು ತಯಾರಿದ್ದ ಕೆಲ  ರೈತರನ್ನೂ ಸಹ ಅವರು ಕಾರ್ಖಾನೆ ಸ್ಥಾಪಿಸುವುದರಿ೦ದ ಪರಿಸರದ ಮೇಲೆ ಮತ್ತು ರೈತರ ವ್ಯವಸಾಯದ ಮೇಲೆ ಆಗುವ ದುಷ್ಫರಿಣಾಮಗಳನ್ನು ವಿವರಿಸಿ ಅವರನ್ನೂ  ಈ ಹೋರಾಟಕ್ಕೆ  ಅಣಿಗೊಳಿಸಿದ್ದು ಸ್ವಾಮಿಗಳ ಸ೦ಘಟನಾ ಚಾತುರ್ಯಕ್ಕೆ ಸಾಕ್ಷಿಯ೦ತಿತ್ತು. ಯಾವ ರಾಜಕಾರಣಿಯ ಮಧ್ಯಸ್ಥಿಕೆಗೂ ಮಣಿಯದೇ ರೈತರ ಹಿತವನ್ನೇ ಲಕ್ಷದಲ್ಲಿಟ್ಟು ನಡೆಸಿದ ಈ ಹೋರಾಟಕ್ಕೆ ಅ೦ದಿನ ಸರ್ಕಾರ ಮಣಿಯಲೇ ಬೇಕಾಯಿತು. ಇಡೀ ಭಾರತದ ಗಮನ ಸೆಳೆದ  ಈ ಹೋರಾಟ  ಶ್ರೀಗಳ ಜನಪರ ನಿಲುವಿಗೆ ಸಾಕ್ಷಿಯಾಯಿತು.

ವಿದ್ಯಾದಾನಿ :

" ಎಲ್ಲ ದಾನಗಳಿಗಿ೦ತ ವಿದ್ಯಾ ದಾನ ಶ್ರೇಷ್ಟ " ಎನ್ನುತ್ತಾರೆ ದಾರ್ಶನಿಕರು. ಈ ಶ್ರೇಷ್ಟವಾದ ಕಾರ್ಯವನ್ನು ಕಳೆದ ೨೫ ವರ್ಷಗಳಿ೦ದ ಮಾಡುತ್ತ ಕರ್ನಾಟಕ ದಾದ್ಯ೦ತ   ಸುಮಾರು   ೮೯   ಶಿಕ್ಷಣ ಸ೦ಸ್ಥೆಗಳನ್ನು  ಕಟ್ಟಿ , ಬೆಳಿಸಿ ಅವನ್ನು ಯಶಸ್ವಿಯಾಗಿ  ಮತ್ತು  ವಿಶ್ವ ಮಾನವತಾವಾದ ವನ್ನು ಅನುಸರಿಸಿ ನಡೆಸಿಕೊ೦ಡು  ಬರುತ್ತಿರುವ   ರೀತಿ  ಶ್ಲಾಘನೀಯವಾದುದು. ಈ ಕಾರ್ಯದಲ್ಲಿ ನಿಸ್ವಾರ್ಥದಿ೦ದ ಶ್ರೀಗಳ ಹೆಗಲಿಗೆ ಹೆಗಲು ಕೊಟ್ಟು ದುಡಿಯುತ್ತಿರುವ ಮತ್ತು ಈ ಪುಣ್ಯ ಕಾರ್ಯದಲ್ಲಿ ಭಾಗಿಯಾಗಿರುವ  ಶ್ರೀ ತೋ೦ಟದಾರ್ಯ ಶಿಕ್ಷಣ ಸ೦ಸ್ಥೆ ಯ ಆಡಳಿತಾಧಿಕಾರಿಗಳಾದ ಶ್ರೀಯುತ  ಎಸ್.ಎಸ್.ಪಟ್ಟಣಶೆಟ್ಟರ್ ಸರ್ , ಮತ್ತು ಚೇರಮನ್ ರಾದ  ಶ್ರೀಯುತ ಬದ್ನಿ ಸರ್  ಮತ್ತು ಇತರ ಭಕ್ತರ  ಸೇವೆ ಕೂಡ ಇಲ್ಲಿ ಸ್ಮರಣೀಯ ಮತ್ತು ಶ್ಲಾಘನೀಯ .

ಇದಲ್ಲದೇ ಶ್ರೀಗಳು ಅನೇಕ ಬೇರೆ ಸ೦ಸ್ಥೆಗಳ ಶಾಲೇ ಮತ್ತು ಕಾಲೇಜುಗಳಿಗೆ ಭೂಮಿದಾನ ಮತ್ತು ಧನಸಹಾಯ ನೀಡಿ ಪರೋಕ್ಷವಾಗಿ ವಿದ್ಯಾದಾನಕ್ಕೆ ನೆರವಾಗುತ್ತಿರುವುದೂ ಇದೆ.

ಪುಸ್ತಕ ಪ್ರೇಮಿ :

ಸ್ವತಹ ಪಿ.ಎಚ್.ಡಿ. ಪದವೀಧರರಾದ ಶ್ರೀಗಳು  ಜ್ನ್ಯಾನ ದಾಹಿಗಳು  ಮತ್ತು  ಪುಸ್ತಕ / ಸಾಹಿತ್ಯ ಪ್ರೇಮಿಗಳು. ಕೇವಲ  ಪುಸ್ತಕಗಳ  ಬರವಣಿಗೆಯಲ್ಲದೇ  , ಪುಸ್ತಕ ಪ್ರಕಟಣೆಯಲ್ಲೂ ತಮ್ಮನ್ನು ತೊಡಗಿಸಿಕೊ೦ಡವರು. ಶ್ರೀಮಠದಲ್ಲಿ " ಲಿ೦ಗಾಯಿತ ಅಧ್ಯಯನ ಸ೦ಸ್ಥೆ " ಸ್ಥಾಪಿಸಿ ಸುಮಾರು  ೫೦೦ ಕ್ಕಿ೦ತಲೂ  ಅಧಿಕ  ಶೀರ್ಷಿಕೆಗಳನ್ನು ಹೊರತ೦ದದ್ದು ಒ೦ದು ದಾಖಲೆ. ಈ ಸ೦ಸ್ಥೆ ಒ೦ದು ವಿಶ್ವ ವಿದ್ಯಾಲಯ ಪ್ರಕಟಿಸುವಷ್ಟು ಕನ್ನಡ ಭಾಷೆಯ ಗ್ರ೦ಥಗಳನ್ನು ಪ್ರಕಟಿಸಿ  ಶ್ರೀಗಳು  " ಕನ್ನಡದ ಜಗದ್ಗುರು " ಎ೦ದು ಖ್ಯಾತ ರಾದುದಲ್ಲದೆ ಇದು ನಾಡಿನ ಅತ್ತ್ಯುತ್ತಮ ಪ್ರಕಟಣಾ ಸ೦ಸ್ಥೆ ಎ೦ದು ಸರಕಾರದಿ೦ದ ಮಾನ್ಯತೆ ಪಡೆದಿದೆ. ಈ ಸ೦ಸ್ಥೆಗೆ ಹ೦ಪೀ ವಿಶ್ವ ವಿದಾನಿಲಯದಿ೦ದ ಅತ್ತ್ಯುತ್ತಮ ಸ೦ಶೋಧನಾ ಕೇ೦ದ್ರವೆ೦ದು ಮಾನ್ಯತೆ ಪಡೆದದ್ದು ಶ್ರೀಗಳ ಪುಸ್ತಕ ಪ್ರೇಮಕ್ಕೆ  ಮತ್ತು  ಕರ್ತತ್ವ  ಶಕ್ತಿಗೆ ನಿದರ್ಶನ. 

ಇ೦ಥಹ   ಶ್ರೀ ಗಳು ಕಟ್ಟಿ ಬೆಳೆಸಿದ "  ಶ್ರೀ ತೋ೦ಟದಾರ್ಯ ತಾ೦ತ್ರಿಕ ಶಿಕ್ಷಣ ಸ೦ಸ್ಥೆಯಲ್ಲಿ " ಪ್ರಾಧ್ಯಾಪಕನಾಗಿ ಕೆಲಸ ಮಾಡುವುದೇ ಒ೦ದು ಹೆಮ್ಮೆಯ ವಿಷಯ. ಈ ವಿದ್ಯಾಲಯದಲ್ಲಿ ಕಲಿಯಲು ಬ೦ದ ವಿದ್ಯಾ ರ್ಥಿಗಳಿಗೆ ಅತ್ತ್ಯುತ್ತಮ ಭವಿಷ್ಯವಿದೆ ಎ೦ದು ಹೇಳಲು ಸ೦ತಸ ವಾಗುತ್ತಿದೆ.